- Tumblr Posts
1. على فكرة من أنا وصغيرة بحب الياسمين كتير ، كانت في شجرة بالحارة اللي فيها مدرستي شجرة بتجنن بياضها وريحتها بتاخد العقل ، الصراحة كانت طالعة برا سور الجيران فكنت أستحي أضل واقفة عندها وقت طويل بس كنت أستغل كل فرصة بمشي فيها من نفس الشارع اركض عليها واوقف على اطراف اصابعي واشمها واتلمس ورقاتها الناعمات الصغار خاصة بس يكون في شمس وفيتها تكون خفيفة مع نسمة هوا تحرك ورداتها على وجهي شعور أعجز عن وصف حلاوته ، أول يوم شفنا فيه بعض كنت اقطف كم ورده واخدها معي للبيت بس كانت تدبل وكنت ازعل لأني بحطها بكاسة ماء وكنت افكر هالشي بخليها تضل زي ما هي ، الحمد لله أدركت الأمر وبالمرات اللي بعدها اكتفيت إني اسلم عليها وأحضنها وما اخد شي منها وارجعلها بكل شوق ، بحبها مابدي اشوفها بتدبل وبسببي !! كبرت ومرت السنين وصار عندي حساسية الربيع وبتحسس من بعض الروائح واللي صدمني إنو أول ريحة تحسست منها هي ريحة الياسمين خاصة بالعطور ، بالمناسبة الياسمين عطر أمي المفضل، و جدًا بتعب بس ترش منه واستنشق ريحتو بس برضو بحب الياسمين ، صرت نادراً اشوف شجرة ياسمين بحكم إنو المدينة مش نفسها ولا الحارة نفسها وحتى أنا مش نفسي ، اللي خطرلي بس شفت صور لشجرة الياسمين وشفت منهم عبارةبتحكي : " ويبقى الياسمين أبيضاً مهما خانتهُ الفصول " معقول !!
يتبع ...
2/5/2024
12:31 am.
2. " ويبقى الياسمين أبيضاً مهما خانتهُ الفصول " معقول !! يعني حتى لو الشمس مو شمسها ولا النسمة نسمتها هتضل زي ماهي .. تعجبت رغم رقتها وأمانها إلا إنو ممكن هالفصول تخونها !! بحثت شوي بالموضوع وعرفت إنو زهور الياسمين إلها حول ال 200 نوع ومن ضمنهم الشتوي !! اللي بكون لونو جاي على اصفر وفيه بعضه بيكون أحمر وبكل بلد بتكون فيه هاي الأزهار مختلفة عن غيرها وبرضو بدها عناية وشمس مناسبة ولازم ترتوي بكمية ماء مناسبة ... وعرفت برضو إنو " أبيضاً " فيها خطأ إملائي لأنه ممنوع من الصرف وما بنحطلها تنوين فتح فتكتب " أبيضا " .. طيب بالنسبة لوجود الياسمين بكل الفصول فهي مش موجوده بكل فصول السنة بالعكس بتخلتف عليها الفصول وببتغير زينا .. مش كل شي بنعرفو صحيح ، صفنت شوي واتخيلت لو الإنسان اللي بحبنا يعاملنا زي الياسمين ، تكون نسمتو خفيفة يشرح الصدر ما يكتمه يكون ضِلو أمان إلنا من أي شي بهدد راحتنا ، يستنانا دائماً بنفس المكان ونحس حالنا بوجوده بخف الريشة ، طيب ليش ما خاف عليّ زي ماخفت انا بس قطفت الياسمين ودبلت ، طيب ما هزتو نوبات السُعال اللي بتجيني بس استنشقت كلماته !! طيب لو أنا قلبي متلها مش حرام يدبل ! مش حرام يطلع شوك على ورداتها الناعمات ! مش حرام تضل روحي عطشانه وما يرويها ! ... وكأنّني زهرةُ يَاسمين مُنفردة بين أورَاقِها الكثيفة لَم يَكن لهَا نصيبٌ بتلكَ الزهراتِ المجتَمعة بأحضانِ بَعضها وجاءَ ذاكَ المُحبُ ذو الوجهِ اللّطيفُ اخذَني بيدهِ الرقيقة معهُ في أعلى جيبِ ثوبهِ الأبيض تمامًا عند قَلبه ، لا مانع لديّ طوالَ رحلتي معه في حُضن كُل هَذا الدفئُ كانَ مؤنسي الوحيد ، رغم ذُبولي كَانت رائحتهُ تنمو بأوراقي لكنّ طَريقُنا طَال والمسارُ تغير رُغم هذا بَقِيتُ ذاتَ الياسمين رغم عَطشي و وحدَتي معكَ ، و عند وصولك مَحطتُنا وضَعتَني بِجانبِ صَحراءٌ قَاحلة ونَسيتَني ، أيتهيأُ لكَ إنني صّبّار لشدة تَحمُلي أهمَالَ رِعايتُكَ لي بِمشوارِ تلكَ السنين !! لِما تُريد أن تَقتلعَ مني أورَاقي الحَريريةَ وتستَبدِلُهَا بأشواكِ مُؤذية وَبعدَها تَحمّلها ذنبُ جُروحكَ التي جاءَت بِفعلكَ ، هذه الأشوكُ التي غُرست بنفسي ولآنت لكَ ، من أَينَ لكَ تلكَ القسوةَ أيُّها المُحب ، أم قسوتكَ أتت من قسوةِ أيامكَ ومَرارتُها ، وتكَالبت الظروف عليكَ وهزمتكَ وأخَذت مني أجملُ وأرقُ أنسانٍ فُزتُ به مِن بين هَزائمي !! اشتاقُ لنَسماتكَ في أشدّ الأيامِ حرارةً ، لكن أنتَ الذي بَنيتَ سياجٍ شائكٌ عند ذاكَ السور ، وما يُألمني حقًا ليسَ اليساجَ وإنّما طولي الذي لا يُساعدني في ذلكَ ، شَتانَ بين غَايةٍ بِإقرَار وبين رَغبةٍ تُمنع بالإجبَار .
1:11 am .
3/5/2024